مصر التاريخ .. نقل المومياوات الملكية الفرعونية

٢٢ حاكم، بشر زيك زيهم، حكموا الاراضي المصرية من الاف السنين، وفيه اللي حكم اكتر من مصر، واللي ملحقش يحكم غير حتة صغيرة، عاشوا في قصور وسط الخدم والحشم والسلطة، بالطول وبالعرض، كانوا زيك بيفكروا، عندهم جسم وعقل ورغبات، ارادة، جيوش بالطول وبالعرض، كلمات نافذة.

Advertisements

٢٢ جسد خاو ل٢٢ حاكم ولكل حاكم قصة، من ١٥٥٠ ق.م ل١١٠٧ ق.م ، ٤٤٣ سنة مابين اول ملك لآخر ملك في الموكب، كل واحد فيهم كان ليه بصمة في فترته، احفاد احفاد احفادهم بينقلوهم من مستقر لمستقر، بينا وبينهم ٣٥٠٠ سنة، بينا وبينهم انبياء، رسل، قصص، فتوحات، عقائد، حروب، تطور، غزو، احتلال، استعمار، ثورات، تغييرات جغرافية وسياسية ودينية، اجيال بتتولد واجيال بتفنى، شعوب بتنتهي وشعوب بتبدأ، مدينة مكان مدينة مكان مدينة.

مصر التاريخ .. نقل المومياوات الفرعونية

حرفيا .. تاريخ مصر القديمة “الدولة الحديثة” كله هيعدي من قدامك بكرة في ٤٥ دقيقة هي طول مدة المسيرة، ١٨ حاكم واربع ملكات، سنين من الحكم لجدودك اللي عاشوا زي ما انتا عايش دلوقتي، اعرف عنهم ولو سطر  ..

– سقنن رع تاعا الثاني اللي حكم طيبة في ظروف احتلالية، واعلن الحرب على الهكسوس اللي احتلوا شمال بلدك، ومات وهو بيحارب قبل ما ينعم بتحرير البلد في اسرة قاومت احتلال الهكسوس على طول تاريخها ..

– أحمس نفرتاري زوجة الملك أحمس اللي شاركت جوزها في حرب التحرير من الهكسوس، واول واحدة في التاريخ تمسك قيادة فرقة عسكرية كاملة وتحارب بنفسها على رأس الفرقة، واللي حكمت مصر بعد جوزها كوصية لابنها لحد بلوغه سن الرشد ..

– أمنحتب الأول اللي لغى السخرة في مصر، وانتصر على الغزو الليبي للدلتا بعد وفاة ابوه احمس الاول، وقدر انه يأمن حدود مصر من الغزاة ويتوسع لحد شلالات النيل، واول واحد اهتم بأجور العمال والحوافز

– تحتمس الأول اللي قدر يتوسع بمصر لابعد حدود ليها في فترته، ويضم اجزاء من الشام ومن افريقيا، واهتم ببناء المعابد في مصر، وكان الاول اللي يرفض انه يتدفن في هرم ويفضل انه يتدفن بعيد شوية، في وادي الملوك ..

– تحتمس الثاني و حتشبسوت الزوجين والاخين اولاد تحتمس الاول، الاول كان ضعيف ومريض وليه عشيقة غير مراته لكن ليه انجازات عسكرية اهمها السيطرة على تمرد النوبة، والتانية تبقا صاحبة الشخصية القوية اللي شاركت جوزها في الحكم لحد ما اقصته خالص وانفردت بالحكم والقداسة، وقدرت انها توسع التجارة الخارجية لمصر وتعيد فتح المناجم المهملة كواحدة من انجح حاكمي مصر في التاريخ، وموياءها الشهيرة بالمومياء المبتسمة ..

– تحتمس الثالث الابن الغير شرعي لتحتمس الثاني واللي ربته حتشبسوت، داهية الحروب واذكى من حكم مصر في تاريخها كله، اللي استخدم سياسة الهجوم من اجل الدفاع واللي قدر يحط بصمته في المدارس العسكرية لحد النهاردة، ويهزم ملوك ٢٠٠ مملكة في تل مجيدو في الشام، وهو مؤسس فعلي للإمبراطورية المصرية وواحد من اشهر اباطرة التاريخ القديم ..

– أمنحتب الثاني اللي اتعرف بشدته في حروبه، كان بيبعت الجيش للحكام المتمردين يخضعهم بالقوة، اتشهر عنه انه قبض في حرب من الحروب على ٩٠ الف اسير، وليه قاعات في المعابد اشهرها قاعته في معبد الكرنك ..

– تحتمس الرابع اللي مكنش الوريث الشرعي للحكم، لكنه ادعى انه شاف الاله رع في الحلم بيقوله ان ابو الهول مدفون وانه لو ازاح الرمال من عليه هيديله ملك مصر، في لوحة شهيرة بين ايدين ابو الهول، واتشهر عنه حملته على شمال سوريا وادخاله لمصر خشب من شجر الأرز الشهير هناك ..

– أمنحتب الثالث من اعظم ملوك مصر القديمة، محب الرياضة اللي يقال انه اصطاد لوحده ١٠٠ ثور بري في يوم، و١٠٢ اسد طول فترة حكمه، اهتم ببناء المعابد خصوصا معبده الجنائزي وتمثاليه الشهيرين في طيبة الغربية، وعرف عصره بإنه كان عصر رخاء على المصريين ..

– الملكة تي ودي كانت بنت وزير غني يقال انه من الاجانب اسمه يويا، اتجوزت الملك أمنحتب التالت، وخلفت منه امنحتب الرابع اللي بعد كدة هيعمل ثورة دينية شهيرة ويوحد الآلهة في الإلة آتون، وتبقا جدة توت عنخ آمون اشهر الملوك المصريين، وهيا نفسها كانت معبودة كشكل من اشكال الربّة حتحور، وكانت صاحبة نفوذ جوا القصر الملكي خلال عهد جوزها وعهد ابنها، كانت مستشارة ملكية بشكل رسمي، وكانت اول واحدة تسجل اسمها في المعاملات الرسمية كملكة، بسبب قوة شخصيتها ..

Advertisements

– سيتي الأول من الاسرة ال١٩ المصرية، مشهور عنه انه حارب في الشام وقاوم الحيثيين في آسيا الصغرى وعمل معاهدات هناك، وده اللي كان فرعون مصر في فيلم exodus gods and kings ابو رمسيس الثاني ..

– رمسيس الثاني اعظم ملوك مصر ومن اطول فترات الحكم والاكثر اثارة للجدل، اللي معبده عالجنية المصري، ٦٧ سنة حكم فيهم رمسيس الثاني مصر، تعامد الشمس الشهير بيكون على تمثاله، اكثر الابنية والمعابد اتبنت في عهده، تمثال رمسيس معروف، واسس في عهده مدن كتير زي “بر مسيس” في الدلتا، ووصل عدد جيشه ل١٠٠ الف، ومشهور عنه معركة قادش الشهيرة اللي فيها اول معاهدة سلام في تاريخ كوكب الارض، وطبعا الادعاء بكونه فرعون موسى اللي مفيش دليل يذكر عليها ..

– مرنبتاح ابن رمسيس الثاني وهو المكمل لسيرة ابوه واللي تولى الحكم وهو فوق ال٦٠ سنة، والمشهور عنه لوحة انتصاره على قبائل “يسرائل” واللي يقال انها الدليل الوحيد على وجود الشعب ده في التاريخ، مع اختلاف النظريات، وليه العديد من المنشآت والاصلاحات الداخلية ..

– ميريت آمون بنت رمسيس الثاني واخت مرنبتاح، بعد ما امها نفرتاري ماتت، ابوها اتجوزها وخلاها ملكة، وكاهنة للربّة حتحور يعني هي اللي بتتولى اقامة الشعائر الدينية ليها، والمشهور عنها تمثالها الشهير جدا في اخميم اللي بيقال انه واحد من اجمل التماثيل المصرية في التاريخ ..

– سيتي الثاني الملك اللي اتشهر عنه صراعه على الحكم مع ملك تاني اسمه “أمن مسه”، اللي خرج من الصعيد ونافس سيتي الثاني على الحكم، ٦ سنين بس هيا طول فترة الحكم اللي كانت كلها صراع عليه، وتخريب لمقبرة وانجازات الملك سيتي الثاني، وكان الملك سيتي الثاني اول ملك يعيّن مهندس سوري عشان يبني مقابر عائلته، اللي هوا المهندس باي ..

– سبتاح خليفة سيتي الثاني، وابن غير شرعي لام كنعانية، كان طفل عنده ١١ سنة، وبمساعدة المهندس السوري “باي” قدر انه يوصل للحكم لكنه كان حكم غير حقيقي، ٦ سنين بس، لحد ما صلاحيات المهندس باي كترت وبدأ يكتر في الكلام فا اتعدم في عهد سبتاح، ومات سبتاح بدوره بعديه ..

– رمسيس الثالث تاني ملوك الاسرة ال٢٠ المصرية، اخر الملوك العظيمة في المملكة المصرية الحديثة، اخر الملوك المحاربين اللي خرجوا في غزوات لحماية مصر ورجعوا بالغنايم، الا ان كتر الحروب ضعف مصر بعد كدة، ومشهور عنه انه كان عرضة للمؤامرات اللي حاولت تغتاله في حياته، منها مؤامرة الحريم الشهيرة بقيادة زوجته “تيا” اللي اتقبض عليها وعلى منفذها واتعدموا، لكن نقدر نقول ان المؤامرة نجحت لانه مات بعدها، ومنفذها هو المشهور عنه بأنه “المومياء الصارخة” ..

– رمسيس الرابع اللي تولى الحكم بعد رمسيس الثالث، عمل حملة انشاءات ضخمة حاول فيها يعيد مجد جده رمسيس التاني لمصر، صاحب اكبر بعثة كشفية في التاريخ بواقع ٨٣٦٨ راجل عشان يوسع شغله في معبد خونسو، وبدأ في عهده الفساد الاداري وبداية التدهور ..

– رمسيس الخامس اللي حكم ٤ سنين بس، واتعرفت فترته الصغيرة في الحكم بالفساد لكنه كان بيحاول يساير القانون ويطبقه، ملوش انجازات تذكر غير انه كمل شغل في معبد جنائزي، ومات وهو شاب غالبا بمرض الجدري ..

– رمسيس السادس حاول انه يصد غزو اللصوص الليبيين والمصريين عالمقابر، وهو بدوره سرق مقبرة رمسيس الخامس اللي كان بيبنيها لنفسه ووسعها وخلاها تخصه هوا، وفي عهده الامور اتدهورت، والنفوذ المصري في كنعان اتهزم، ونفوذه في الصعيد قل، واللي ادى لاضطراب الاقتصاد ورفع الاسعار،، لكنه كان طموح وعايز تماثيل ليه يتفاخر بيها، فما كان منه الا انه بقا يحط اسمه على خراطيش الملوك السابقين، ويعمل لنفسه تماثيل كتير، اهو حاجة يتفاخر بيها ..

– رمسيس التاسع حكم ١٧ سنة تقريبا وحاول انه يبني في هليوبوليس وغيرها، الا ان ضعف الحكم والاضطرابات والفساد، واموال الغنائم اللي كانت بتروح عالكهنة، كانوا سبب في فقر مصر بشكل عام، فا فترته اتعرفت انها كانت في النهايات، الفقر ضرب مصر وخلى الناس تتهجم على مقابر الملوك المقدسة وتسرقها وتبيع محتوياتها ..

حاول تتفرج وتنبهر، وتتخيل كل واحد فيهم عاش ازاي، حكم ازاي، كان بيفكر ازاي، بيكبر ازاي، قرارات، انفعالات، فطار، غدا، عشا، نوم وصحيان، لبس ملكي ولبس حربي، غزوات وحروب وجواز وحب، اطفال فشباب فكبار، فمومياء للعرض وسطرين بالتاريخ، وصفحة كبيرة من صفحات تاريخ الدولة اللي عاشوا فيها، من ٣٥ قرن فاتوا.

Advertisements

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق